मुंबई (माझं गांव माझं शहर): महाराष्ट्राच्या प्रशासकीय यंत्रणेत मोठी हालचाल घडवत राज्य शासनाने एकाचवेळी २५ वरिष्ठ IAS अधिकाऱ्यांच्या बदल्या केल्या आहेत. मंत्रालयातून यासंदर्भातील शासन निर्णय (GR) जाहीर करण्यात आला असून, या बदल्यांमुळे राज्याच्या प्रशासनात मोठी उलथापालथ झाल्याचे चित्र आहे.
प्रशासनातील कार्यक्षमता वाढवणे, विविध विभागांमध्ये समन्वय साधणे आणि धोरणांची प्रभावी अंमलबजावणी करण्याच्या दृष्टीने या बदल्या करण्यात आल्याचे सांगितले जात आहे. बदली आदेश मिळाल्यानंतर संबंधित अधिकाऱ्यांना तत्काळ नवीन पदाचा कार्यभार स्वीकारण्याचे निर्देश देण्यात आले आहेत.
या मोठ्या बदल्यांमध्ये जिल्हाधिकारी, महापालिका आयुक्त, तसेच विविध महामंडळे व विभागांतील वरिष्ठ अधिकाऱ्यांचा समावेश आहे. काही महत्त्वाच्या बदल्यांमध्ये छत्रपती संभाजीनगर, कोल्हापूर, लातूर, नागपूर, सोलापूर, चंद्रपूर यांसारख्या प्रमुख जिल्ह्यांतील पदांमध्ये मोठे फेरबदल करण्यात आले आहेत.
डॉ. राजेंद्र भारूड यांची कोल्हापूर महानगरपालिकेच्या आयुक्तपदी नियुक्ती करण्यात आली असून, अमोल येडगे यांची छत्रपती संभाजीनगर महानगरपालिकेच्या आयुक्तपदी बदली झाली आहे. तसेच कुमार आशीर्वाद यांची नागपूर जिल्हाधिकाऱ्यपदी, तर कार्तिकयेन एस. यांची सोलापूर जिल्हाधिकाऱ्यपदी नियुक्ती करण्यात आली आहे.
याशिवाय, अनेक जिल्ह्यांच्या जिल्हाधिकारी पदांमध्ये बदल करण्यात आले असून, काही अधिकाऱ्यांना महत्त्वाच्या महामंडळे व प्रकल्पांमध्ये जबाबदारी देण्यात आली आहे. या बदल्यांमुळे राज्याच्या प्रशासकीय धोरणांना नवसंजीवनी मिळेल, अशी अपेक्षा व्यक्त केली जात आहे.
दरम्यान, एवढ्या मोठ्या प्रमाणावर एकाचवेळी झालेल्या बदल्यांमुळे मंत्रालयात खळबळ उडाली असून, राजकीय व प्रशासकीय वर्तुळात या निर्णयाची जोरदार चर्चा सुरू आहे. आगामी काळात या बदल्यांचा प्रशासनाच्या कामकाजावर नेमका काय परिणाम होतो, याकडे सर्वांचे लक्ष लागले आहे.
