परंडा, दि.५(तानाजी घोडके) परंडा शहरात गेल्या सहा दिवसांपासून पाणी पुरवठा विस्कळीत झाल्याने नागरिकांना तीव्र पाणीटंचाईचा सामना करावा लागत आहे. या पार्श्वभूमीवर नगराध्यक्ष जाकीर सौदागर यांनी जनशक्ती आघाडीच्या पाणी पुरवठा सभापतींवर जोरदार टीका करत, “काम जमत नसेल तर तात्काळ राजीनामा द्यावा,” अशी ठाम मागणी केली आहे. या संदर्भात आयोजित पत्रकार परिषदेत त्यांनी आघाडीच्या कारभारावर सडकून टीका केली.
पाणी नियोजनात अपयश
नगराध्यक्ष सौदागर म्हणाले की, शहरातील पाणी पुरवठ्याचे योग्य नियोजन करण्यात सभापती पूर्णतः अपयशी ठरले आहेत. नागरिकांना दररोज पाण्यासाठी वणवण करावी लागत असून, प्रशासनाने याकडे गांभीर्याने लक्ष देण्याची गरज आहे. “जर सभापतींना तांत्रिक माहिती नसेल, तर त्यांनी तज्ञांकडून मार्गदर्शन घ्यावे. केवळ पद भूषवून चालणार नाही, तर जनतेला मूलभूत सुविधा पुरवणे हे लोकप्रतिनिधींचे कर्तव्य आहे,” असे त्यांनी स्पष्ट केले.
विकासकामांकडे दुर्लक्ष
शहरातील स्वच्छता, आरोग्य, पथदिवे आणि पाणी पुरवठा या महत्त्वाच्या समित्या जनशक्ती आघाडीकडे असतानाही विकासकामांकडे दुर्लक्ष होत असल्याचा आरोपही त्यांनी केला. “या सर्व बाबींमध्ये अपेक्षित सुधारणा दिसून येत नाही. परिणामी नागरिकांमध्ये असंतोष वाढत आहे,” असे सौदागर म्हणाले.
केबिन वादातून राजकारण
यावेळी त्यांनी केबिन वादाचाही उल्लेख केला. जनशक्ती आघाडीच्या १२ नगरसेवकांनी उपनगराध्यक्षांसाठी स्वतंत्र केबिनची मागणी केली होती. मात्र, तांत्रिक कारणास्तव ती मंजूर न झाल्याने मुख्याधिकाऱ्यांची बदनामी करण्याचे षडयंत्र रचले जात असल्याचा गंभीर आरोप त्यांनी केला.
आघाडीची भूमिका
दरम्यान, जनशक्ती आघाडीचे नगरसेवक सत्तार पठाण यांनी प्रशासनावर टीका करत, “मुख्याधिकारी दीर्घकाळ गैरहजर राहिल्यामुळे कामांवर परिणाम होत आहे. याबाबत जिल्हाधिकाऱ्यांकडे तक्रार करणार,” असा इशारा दिला आहे.
“काम नसेल तर खुर्ची सोडा”
नगराध्यक्षांनी स्पष्ट शब्दांत सांगितले की, “शहरातील आरोग्य, स्वच्छता आणि पाणीपुरवठा या मूलभूत सुविधांची जबाबदारी संबंधित सभापतींची आहे. जर हे प्रश्न सुटत नसतील, तर जनतेला वेठीस धरण्यापेक्षा पदाचा राजीनामा द्यावा.”
नागरिक त्रस्त, संघर्ष तीव्र
सध्या ऐन उन्हाळ्याच्या तोंडावर पाणीटंचाईमुळे परंडा शहरातील नागरिक हैराण झाले आहेत. पाणी प्रश्नावरून नगराध्यक्ष आणि जनशक्ती आघाडी यांच्यातील राजकीय संघर्ष अधिकच तीव्र झाला असून, येत्या काळात हा वाद आणखी चिघळण्याची शक्यता आहे.
या पत्रकार परिषदेला नगराध्यक्ष जाकीर सौदागर यांच्यासह शिंदे गटाचे सात नगरसेवक, पदाधिकारी व नागरिक मोठ्या संख्येने उपस्थित होते.
