परंडा शहरातील सोमवार गल्लीत महावितरणचा भोंगळ कारभार; उघड्या मीटर पेटीमुळे अपघाताची भीती

परंडा | माझं गांव माझं शहर

परंडा शहरातील सोमवार गल्लीतील कल्याण स्वामी मठासमोर महावितरण कंपनीने वीज ग्राहकांचे मीटर एकत्रितपणे बसवण्यासाठी उभारलेली मीटर पेटी नागरिकांच्या जीवितास धोका निर्माण करणारी ठरत असल्याचा आरोप स्थानिक रहिवाशांनी केला आहे. संबंधित मीटर पेटी अत्यंत निष्काळजीपणे बसवण्यात आल्याने परिसरात संतापाची लाट उसळली आहे.

जमिनीलगत उघडी मीटर पेटी

स्थानिकांच्या माहितीनुसार, ही मीटर पेटी जमिनीपासून अवघ्या तीन ते चार फूट उंचीवर बसवण्यात आली आहे. त्यामुळे लहान मुले, पादचारी तसेच जनावरांचा सहज संपर्क या पेटीशी येऊ शकतो. विशेष म्हणजे, पेटीला कुलूप लावण्याची व्यवस्था असतानाही ती उघडी ठेवण्यात आली असून आतमधील वीजवाहक तारा उघड्या अवस्थेत दिसत आहेत. त्यामुळे कोणत्याही क्षणी गंभीर अपघात घडण्याची भीती व्यक्त केली जात आहे.

पावसाळ्यात वाढणार धोका

पावसाळ्याच्या पार्श्वभूमीवर उघड्या वीजतारा आणि उघडी मीटर पेटी अधिक धोकादायक ठरू शकते. पाणी साचल्यास किंवा ओलाव्यामुळे शॉर्टसर्किट होऊन जीवितहानीची शक्यता निर्माण होऊ शकते, अशी चिंता नागरिकांनी व्यक्त केली आहे.

वाहतुकीलाही अडथळा

सोमवार गल्लीतील रस्ता आधीच अरुंद असून त्यात ही मीटर पेटी रस्त्यालगत आणि कमी उंचीवर असल्याने दुचाकी व चारचाकी वाहनचालकांना अडचणींचा सामना करावा लागत आहे. एखाद्या वाहनाचा धक्का लागल्यास पेटीचे नुकसान होऊन मोठी दुर्घटना घडू शकते.

तातडीने कारवाईची मागणी

या गंभीर बाबीकडे महावितरणच्या वरिष्ठ अधिकाऱ्यांनी तातडीने लक्ष द्यावे, अशी मागणी स्थानिक नागरिकांनी केली आहे. संबंधित मीटर पेटी सुरक्षित ठिकाणी किंवा विद्युत खांबावर जमिनीपासून किमान सहा फूट उंचीवर बसवावी तसेच तिला त्वरित कुलूप लावून आवश्यक सुरक्षाव्यवस्था करावी, अशी मागणी नागरिकांनी केली आहे.

प्रशासनाने याकडे दुर्लक्ष केल्यास आंदोलनाचा मार्ग स्वीकारण्याचा इशाराही सोमवार गल्लीतील नागरिकांनी दिला आहे.